सुत्रबद्ध शासन

मौलिकताको आवाज
तिमीबाट जस्तो निस्किन्छ
मबाट नि त्यस्तै निस्किन्छ
समुद्रबाट उकुसमुकुस भएर बाफहरु
तिम्रो शिरमाथिको
आकाशमा जसरी बादल बनि
स्वतन्त्र उड्छन् त्यसरी नै उड्छन्
मेरो शिरमाथीको आकाशमा
निरङ्कुशताले जकडिएको तिम्रो शासन
जसरी हरेक दिन सास लिन्छ
गरिब किसानले हुर्काएको विरुवाबाट
त्यसरी नै सास लिन्छन् उनीहरुको सन्तानले
विचारको आलीमा बसेर
र छर्छन्
जिन्दगीको बारीभरि स्वतन्त्रताको विउ
र सिञ्चित हुन्छ
नयाँ जोस नयाँ आवेगका पसिनाहरुले
फुल्दछ हरेक दिन त्यहाँ
आलीमा बसेकाहरुको लागि
सुन्दर फुलहरु
जसरी एउटा इमान्दार क्रान्तिपछि
उदाउँछ स्वतन्त्र दिनहरु
समय अनुसार जनताका तन्त्रहरुको
परिभाषा फेरिन्छन्
हिजो प्रजातन्त्र थियो
आज गणतन्त्र छ
आखिर तन्त्र त
जनतामाथिको सुत्रबद्ध शासन न हो ।